Мемлекеттік академиялық симфониялық оркестрі өзінің өсу, өну жолында үлкен де күрделі шығармашылық кезеңдерден өтті. 1958 жылы ол филармонияның құрамына кіріп, тыңдарман назарына симфониялық музыканың ең үздік үлгілері мен жанды да сәнді дауысын әкелді. Оның ұйымдастырушысы, басшысы және алғашқы дирижеры  Қазақ КСР – нің, Ресейдің, Татар АКСР-нің халық әртісі Фуат Шәкірұлы Мансуров болып, оның есімі осы ұжымның тарихына алтын әріппен жазылды. Ұзақ  уақыт аралығында ұжымды белгілі музыканттар – Виктор Яковлев, Илья Островский, Шамғон Қажығалиев, Ғазиз Дұғашев, Тимур Мыңбаев, Ренат Салауатов, Төлепберген Әбдірашевтер басқарды. Дирижерлық пультта Л.Гинзбург, А.Кац, К.Элиасберг, М.Плетнев, Й. Домаркас сынды атақты дирижерлар тұрып, олардың әрбіреуіне оркестр өзінің дамуындағы жаңа сатыға көтерілгені үшін қарыздар. Ұжыммен шығармашылық қызметтес болған әйгілі орындаушылардың бәрін атау мүмкін емес, дегенмен кейбіреулерін атап өткен жөн болар: С.Рихтер, Л.Оборин, Н.Петров, В.Крайнев, Г.Кремер, М.Ростропович, Д.Шафран, Н.Шаховская, И.Архипова, В.Пьявко, В.Норейка, М.Биешу, Ю.Мазурок, Г.Аксельрод, А.Ведерников, Р.Керер, А.Гаврилов, Д.Шаповалов, М.Майский, Г.Муржа, Л.Тимофеева, Н.Труль және басқалары. Мемлекеттік академиялық симфониялық оркестрінің Қазақстан композиторлардың жаңа туындыларын насихаттаудағы  рөлі ерекше екенін және оркестрдің композиторларымен шығармашылық байланысының бұрыннан қалыптасқан дәстүрі бүгінге дейін ұздіксіз жалғасып келе жатқанын баса айтқанымыз жөн.