Т. Әбдірашев атындағы Мемлекеттік академиялық симфониялық оркестрі ұзақ та қиын шығармашылық жолдан өтті. Мемлекеттік академиялық симфониялық оркестрі 1938 жылы құрылған, 1958 жылдан бастап филармонияға мүше болып, мыңдаған адамдарды симфониялық музыканың жанды үнімен, оның ең жоғарғы формаларымен таныстыра бастады. Оның ұйымдастырушысы, жетекшісі және алғашқы дирижері Қазақ КСР-нің халық әртісі, Ресейдің халық әртісі, Татар АКСР-нің халық әртісі, есімі осы ұжым тарихына алтын әріптермен жазылған Фуат Шәкірұлы Мансұров болды. Ұзақ шығармашылық өсу кезеңінде ұжымды көптеген танымал музыканттар – Виктор Яковлев, Илья Островский, Шамғон Қажғалиев, Ғазиз Дугашев, Тимур Мыңбаев, Ренат Салаватов, Төлепберген Әбдірашев басқарды. Дирижер стендінің артында Л.Гинзбург, А.Кац, К.Элиасберг, М.Плетнев, Дж.Домаркас сияқты көрнекті маэстролар және басқа да бірқатар белгілі дирижерлер болды. Оркестр құрамында – Р.Абдулаева, Е.Бейсембаев, А.Бибанова, И.Дудкина, Г.Нургалиева, А.Оспанова, Е.Пименев, Л.Попова, Т.Ткишев, Т.Хамзина және тағы да басқа музыканттар қызмет атқарған.Ұжымның барлық серіктестерінің арасында атақты музыканттар: С.Рихтер, Л.Оборин, Н.Петров, В.Крайнев, Г.Кремер, М.Ростропович, Д.Шафран, Н.Шаховская, И. Архипова, В.Пиавко, В.Норейка, М.Биешу, Ю.Мазурок, Г.Аксельрод, А.Ведерников, Р.Керер, А.Гаврилов, Д.Шаповалов, М.Майский, Г.Муржа, Л.Тимофеева, Н.Труль және бірқатар көрнекті орындаушылар бар. Қазақ композиторларының жаңа туындыларын насихаттауда Мемлекеттік академиялық симфониялық оркестрдің рөлі зор, оркестрдің композиторлармен шығармашылық достығы күні бүгінге дейін жалғасып келе жатқан дәстүр. 2022 жылы оркестрге дирижер Төлепберген Әбдірашевтің есімі берілді.