Құрметті достар,
«Наурызнаманың» онкүндігі аясында әр күн түрлі тақырыптарға арналғаны белгілі. Осыған сәйкес, 20 наурыз – Ұлттық спорт күні.
Қазақтың ұлттық спорты – рух пен намысты қайрап, бойдағы қуатты шыңдауға өз септігін тигізеді. Ұлттық спортпен шұғылданатын спортшылардың бітім-болмысының өзгеден бөлектеніп тұратыны да осыдан болса керек. Ұлттық спортты ұлықтауға арналған бұл күн спортшылар мен қарапайым халық арасында мереке салтанатын ерекше сезінуге септігін тигізері анық.
Бүгін филармония өнерпаздары Жамбыл атындағы Қазақ мемлекеттік академиялық филармониясының 90 жылдық мерейтойы аясында «Ұлттық спорт» күніне орай, Алматы қалалық №1 балалар үйінде «Наурыз – думан» атты концерт өткізді. Кеште Мәдениет қайраткері Ержан Әлімбетов, Халықаралық байқаулардың лауреаттары Біржан Бәзілжан, Салауат Кәрібаев, Елжан Ахимбаев және тағы да басқа шығармашылық ұжымдардың жеке орындауда өнер көрсетті. Мерекелік бағдарлама Филармония директорының орынбасары Абзал Қуанышұлының Наурыз мейрамына балаларға арналған тілегімен басталды. Қазақтың әні мен күйі орындалып, кішкентайларды ерекше патриоттық сезімге бөлесе, концерттік бағдарлама соңында ұлттық спорт түрі арқан тартыс пен асық ойнаудан жарыс ұйымдастырылды. Топжарған спортсүйер балаларға филармония атынан арнайы сыйлықтар ұйымдастырылды.
