Мерекелік кештердің нүктесін Т.Әбдірашев атындағы ҚР Мемлекеттік академиялық симфониялық оркестрі неміс композиторы Карл Орфтың әлем мән беріп орындайтын «Кармина Бурана» атты шығармасымен қойды.
Концертте көркемдік жетекшісі және бас дирижері Қанат Омаровтың дирижерлік етуімен Т.Әбдірашев атындағы ҚР Мемлекеттік академиялық симфониялық оркестрінің сүйемелдеуінде Б.Байқадамов атындағы Мемлекеттік хор капелласы, Абай атындағы ҚазҰОБТ солистері, «Құрмет» орденінің кавалері Зарина Алтынбаева, халықаралық байқаулардың лауреаттары Эмиль Сакавов, Дамир Садуахасов өнер көрсетті.

Бес күнге созылған жаңа жылдық фестиваль концерттері мен фойеде филармония ұйымдастырған арнайы бағдарламаны келген көрермен жоғары бағалап, ыстық ықыластарын білдірді. Олардың ішінде жыл сайын жаңа жыл кешін қара шаңырақта өткізуді дәстүрге айналдырып, әр ұжымның арнайы бағдарламасын сағына күтетіндер де табылды. Бүгінгі концерттің басқа кештен өзгешелігі де осында. Жаңа жылдан жаңа үміттерге, арман-мақсаттарға жол бастаған әр оқырманның бізден де жаңашылдық күтетіні рас.
Мерекелік кештің қуанышқа толы көңілді сәттері жыл бойына әрбір шаңырақта сақталсын! «Еліміз тыныш, жұртымыз аман болсын»-деген әдемі тілекте 2025-ші жаңа жылдық фестивалімізді аяқтадық.